Vrbnik
        kako ga vide
                kako osjećaju
                        riječju opisuju
                                vrbnički pjesnici


Vrbnik kako ga ja pametin

O zahoji
kad judi Poji fine posli,
sve muli i sve osli
napajaju se na Črišnjici.
Bura puše i sence peče,
ma voda z Rovoznika
seduron teče
va velu kamenu skalnicu
na Črišnjici,
kadi već let i let
dedi i vnuki
moče tverde žujave ruki,
kadi se večer zibje
žažara va kajugi,
va blatu konjske kopita
i delge kozje verugi.

Dr Vlasta Sindik-Pobor
Norrbotten / Švedska
Rijeka 1958.



VRBNIKU

Vrbniče drevni,
dični kalebe beli.
Nad more i nad žali
na  valomet si stal.
Šibala te bura,
mlatil val
i neprijatel  zatiral.
Ma, ti se nisi dal,
va ov kamik otočki
koreni si gelboko zakopal.

Bil si kjonka frankopanska
i njazlo glagoljaštva.
Tu su: dvori, kula
grobnice, oltari,
Statut vrbenski,
misali i brevijari.

Na tvon vrhu zvonik.
Va njen zvoni zvone
stotine let.
Va tvojih kućah s čevjenimi krovi
judi se rajaju, živu i umiraju,
a tvoji stari koreni
vavik nove mladice hitaju.
Sveko leto lastavice prihajaju,
pod strehami na miru
njazla obnavjaju.

Va tebi teče život
skromen, miren, a vesel
va skrbi i delu,
va kantu i veseju,
uz zvuki zvon i sopel.

Lipi naš grade,
čuvamo tvoje vridnosti:
knjigi glagoljske
staru besedu,
tesnek i tanec,                                                    
sopeli i kanet.
                                                 
Zora Volarić Perhat
Rijeka, 1987.



KLANČIĆ   VERBNIKU

Jeden stari gradić
peln putić i kantunić
voltic, podvoltic i klančić.
           Spraven na kupčić
           zbijenih kućic koti grozdić
           i sveka nič pravja i govori.
Ma ki je to gradić
ki ima štatut, brevijar, misali
glagoljicu i najužu na svitu ulicu,
Balature na Potočini i Opjici,
Pojani, Plokati i Galiji,
Pod pojaticun kuće koti v galeriji?
             Verbnik je ta gradić
              ki ima toliko klančić i kantunić
              i k tomu još šegavih glavic!
Tako reš po putiću, prideš v klančić
od kantunića va kantunić
i sopeta va najužu ulicu, va Klančić.

Marica Stašić Milić
Vrbnik, 2003.



VERES

Zavertimo se na modron portu
okolo ruzinavih kolun,
čevjenoga ferala
dokla zamišjeni čekamo
da va dragu pride beli vapor.

Na glatkon valometu
obernimo se vaje sedaj
šoto dibjih želtih rožic
ke ovo leto još lipše cvetu...

Zatancajmo skupa z barkami
na protuletnjoj buri
ka će nan berzo obrazi vežgat.
Mogli bimo i zakantat
-neka na Placi pira ni-
ozdola balkona, va jati,
ter će nas samol kalebi čut.

Nasmijmo se vedron nebu.
Ne smimo se vrimenu i leton
-ke se po klančićih šujaju i teku-
dokla živemo pustit.
Sence nas je marčeno smutilo,
zavavik ćemo dičina ostat,
makar bi mogel z gori
još i snig va Verbnik arivat.

Radovan Toljanić
Vrbnik, 2002.



   V R B N I Č E    G R A D E !

    Nigdir tako sence ne sviti
    ni zvezdi ne blišće
    kako nad tobun.
    Nigdir tako  more ne šepiće
    ni bura ne kanta
    kako vokolo tebe.
 
   Vrbniče dragi,
    samol va tebi
    je serce pelno i  duša  bogata,
    aš budi se i zaspi,
    raja  i umire,
    pokjekne pod brimenon
    i opeta dvigne.

    Kripi  se
    na vrutku  vičnon,
    na doti  onih
    ki prija nas evdi su bili,
    z verun va onih
    ki za nami te prit.
 
    Marija Trinajstić Božić 
    Vrbnik, 2005.


 
STEN

Da mi je znat
ki je zibral
ovu sten i kamik,
za na njoj ostat
vikon vavik?
Kako se je ćutel da mi je znat,
kada na vrh steni
šel se je frmat?
Morda je sence jušto
prišlo ven,
va zlato oblklo
celu sten,
morda more modro
va kamik je lupalo,
pomalo šumeć,
na uho mu šepjalo?
Ili je bila noć,
kada bimo denes znali,
plna žltih zvezd
ke sten su ticali?

Blažena je bila ura i dan,
živuć na toj lipoj steni
denes to znan.
Ćutin on prvi korak
ki još ozvanja skroz vrime
na steni od senca i bure
Vrbnik
njoj je ime.

Marina Valković
Vrbnik, 1996.



Na Čerenci

Na kamiku sidin
ze Čerenca kot na sliki
ves Vrbnik vidin.
Na steni kuće stare
stišnjeni vokolo zvonika,
sence jih zlati, bura melči,
more miruje, polne zvoni.

Leto je prišlo va naš pajiz,
vonja kuš i magriž.
Dibji šipun cvete,
tiće kantaju, kudlačiće lete.
Lip je naš Vrbnik
po gradu i po zaroku
domaćemu i fureškomu oku.

Sprid devet stotin let
su dedi i babi
našemu Gradu ime zapisali.
Čudo su fadigali,
gradili, skerbeli
i sve če su udelali
nan su pustili,
da bimo mi mlajih navadili.

Marinka Matanić Polonijo
Vrbnik, 1998.

 

HOD  VIKOVA

Černa bura Vrbniku priti
a on njoj se uvik ruga,
pek tako gredu skupa skroz sve viki.
Huda buro, niš mi ti ne moreš,
aš čuvaju me moje tverde valometi,
na pročeli kula z pason kamenitin,
po bandah su na straži dvi punti fermani
z kih se černi bor stari kuntra tebi dava.
Pek če mi ti moreš!?

Još kada se z Hlama vili spuste
po svih brigih umilno kantajuć,
kako da  su stare uliki kosi raspleli
vokolo tancaju i slebron se hvale,
na vetru  verte
mameć černu buru neka već popusti,
da se z belin velon  okitit moru.
Sence da jih  stepli i uzrije plod,
pek  će na podzimi, grad svoj
nadarit  zlaton.

Mira Anić
Vrbnik, 2009.